كتب اسماء الشاعر
كثير بنسمع فجر الخلاص قرب ، وماعارفين قرب حقيقي ولي دي دعاية سوشيل ميديا ، في اي مكان انت سفير لي بلدك ،عشان كدا ياغريب خليك اديب ، افرحوا ومن حقكم بس ما بالطريقة دي كل بلد ليها قوانين وانت كضيف لازم تتقيد بالقوانين دي، لانك لما تتجاوز القانون ما بتكون سفير انت كدا بتعرض نفسك لي مخالفة القوانيين وهنا انت المسؤول عن تصرفاتك ، الحصل بعد تحرير الجيلي عبارة عن فوضي كبيرة ، وواجب علينا أننا نراعي الحقوق والواجبات ، والحصل ازعاج ما تعبير عن فرح.
في بيوتنا ممكن نفرح نهنئ بعض بالتلفون ،ونستنه لما نرجع سودانا نعمل زي ما عايزين لانه هناك بلدنا ،بس كمان برضو خلونا نفرح بي نظام ما همجيه ، الغربة والنزوح والحرب المفروض تكون غيرت كتير من سلبياتنا ، وخلتنا نشوف الأمور بي زاوية مختلفة.
وياريت الحرب تكون لينا اكبر درس قدرنا نطلع منه بي حاجه مفيده .
في علاقاتنا مع بعض في حياتنا الخاصه والعامه وفي تعاملنا مع بلدنا وإحساس أنها بيتنا الكبير وفي كل حاجه ، وناخد من كل مكان الحاجه السمحه ، والممكن تكون اضافه، وياريت لو كلنا بنعمل علي تنمية مهاراتنا ، في تقبل بعضنا وارائنا وفي تقابلنا لي بعض واحترام حاجاتنا وخوصوصياتنا وكتير الكتير محتاجين نعالجه ، و عشان في الرجوع يكون في فرق كبير الزول الطلع من السودان قبل سنه ما هو الزول الرجع الان، عشان سودانا الجديد عايزينه خالي من العاهات والعقد النفسيه ،وعشان نقدر نقدم افضل ما عندنا ، وبإذن الله فجر الخلاص قرب
وابقوا الصمود
إرسال تعليق