محمود رمضان يكشف علاقة المداح بالواقع

أيه علاقه مسلسل المداح باللي بيحصل في الواقع وهل دا حقيقي ولا لأ وهل فعلًا فى طلاسم حقيقيه وطرق تحضير حقيقيه ولا لأ بصوا يلا ناخد الموضوع واحده واحده سوا . 

أول حاجه طرق التحضير كلها مفيهاش حاجه حقيقيه هيا فقط مجرد حاجات من خيال المؤلف ، لأن لو فيها حاجه حقيقيه أول شخص هيتأذي المؤلف وبعد كدا المصورين والممثلين ويلايهم حضرتك ياباشا يعني متقلقش مفيش أي حاجه حقيقيه ، حتى ترنيمه الجن مجرد كلمات مركبه مفيهاش أي ضرر عليك تمامًا هيا فقط مجرد كلمات للأثاره والتشويق .

يلا ندخل بقى في ثياق الموضوع .

طبعًا المسلسل بيحاكي الواقع فى حاجات كتير أولهم الفتنه ، اللي هيقوم بيها الدجال واعوانه ، وطبعًا ناس كتير جدًا هتأمن بيه بسبب الحاجات اللي يقدر يعملها واللي منها ، يقدر يحي الموتى ويقدر يخلي السما تمطر ، والأرض تخضر ، عشان كدا فى ناس كتير هتأمن بيه ، وطبعًا الموضوع دا بيتمهدله من أعوانه من الإنس والجن ، عشان يقدروا يفتنوا أكبر عدد من الناس . 

إحنا أصبحنا فى زمن يكذب الصادق ويصدق الكذاب ، عشان كدا لما المسيـخ الدجال يظهر ، كل اللي هيعرف حقيقته ويحاول يبعد غيره عنّه محدش هيصدقه دا بسبب ضعف الإيمان ، ودا اللي بيعمله صابر كل لما يحاول يبعد حد عن سميح محدش يصدقه لدرجه إنهم بقوا يقولوا صابر بيغير منّه لأن الناس كلها بقت حواليه .

حتى أقرب الناس ليه مصدقهوش رحاب وحسن وغيرهم كتير من الناس اللي شافت صابر لعنه عليهم وعلى اللي حواليه ، ونسيوا إن كل شئ قضاء وقدر ومحدش يقدر ياخد روح بني آدم غير لما يكون دي نهايته فعلًا وعمره أنتهي . 

من وجهة نظرى المسلسل خلق حاله جميله أوي ، وخلانا نشوف إن الشر حوالينا واقرب لينا مما نتوقع ، خلانا ناخد بالنا من كلام اللي حوالينا ، لأن الفتنه من أعوان الدجـ،ال هتكون بطريقه غير مباشره عشان ميشككوش حد فيهم .

مثال انا شخص عاوزك تقـتل وتفـسد فى الأرض مش هروح أقولك اقتـل احرق كسـر لأ انا هحللك الحرام هخليه قدامك مباح وحلال على رأي سميح الضرورات تبيح المحذورات من الاخر هخلي كل شئ حرام في عينك حلال ، وكله باللعب على دماغك وبطرق غير مباشره ، عشان لما تقع وتيجي تعاتبني ابرأ نفسي منك .

ودا بالظبط اللي هيعمله إبليس 

بعدين هيبرأ نفسه من الذنب اللي عملناه .

بسم الله الرحمن الرحيم

وَقَالَ الشَّيْطَانُ لَمَّا قُضِيَ الْأَمْرُ إِنَّ اللَّهَ وَعَدَكُمْ وَعْدَ الْحَقِّ وَوَعَدتُّكُمْ فَأَخْلَفْتُكُمْ ۖ وَمَا كَانَ لِيَ عَلَيْكُم مِّن سُلْطَانٍ إِلَّا أَن دَعَوْتُكُمْ فَاسْتَجَبْتُمْ لِي ۖ فَلَا تَلُومُونِي وَلُومُوا أَنفُسَكُم ۖ مَّا أَنَا بِمُصْرِخِكُمْ وَمَا أَنتُم بِمُصْرِخِيَّ ۖ إِنِّي كَفَرْتُ بِمَا أَشْرَكْتُمُونِ مِن قَبْلُ ۗ إِنَّ الظَّالِمِينَ لَهُمْ عَذَابٌ أَلِيمٌ (22)

لأن طبعًا لما الشيطان بيجي يوسوس لينا مش بيقولك قوم أقتـل قوم أسرق لأ ( بيرميك على أول الطريق يخليك تكرهه حياتك وعيشتك ومترضاش ومتحمدش ربنا فاتقوم تسرق وتنهب ولو وصلت للقـتل تـقتل) عشان كدا بقولكم أحذروا الفتن أحذروا سماع أي موسيقي مجهوله المصدر لأن فى انواع موسيقي بتكون مريحه وتدخلك فى حاله أسترخاء لكن بيكون فيها ذبذبات بتأثر على الدماغ .

مسلسل المداح بيوصل لينا رساله ، إن مش أي شخص تثق فيه وإن أقرب الناس ليك ممكن يكونوا هما مصدر الأذي كله ، مش شرط يكون دا بمزاجهم لأ ممكن يكونوا مُغيبين ، كل اللي عليك تقرب من ربك تتمسك بدينك ، وخليك عارف إن الغلط هيفضل غلط لو الدنيا كلها عملته . 

يأتي على الناس زمان 

( القابض فيهم على دينه كالقابض على الجمر )

هما عاوزين يضعفونا عشان لو فقدنا الإيمان بربنا دي هتكون بوابه دخولهم لينا ، هما ضعاف وضعاف أوي قدام الإنسان المؤمن واقويه جدًا قدام الإنسان اللي إيمانه ضعيف لأنهم بيلاقوا مليون باب مفتوح قدامهم يدخلوله منّه .

نصيحة قرب من ربك حافظ على صلاتك ، خد المعلومات من أهل العلم مش أي شخص مسك سبحه ولبس جلابيه تاخد منّه الفتوه ، او المعلومه ، أستقيموا يرحمكم الله .